Mowqifkii Sheekh Shariif ee Shalay Maxaa Maanta Iska Bedalay?

Isniin 24 Shacbaan 1429 =25/08/2008

---

Shariifka waxaa hore looga hayaa in uu yiri "Kooxda Impghati iyo ashahaado la dirirka lama fariisanayno maxaa yeelay waxaan noqonaynaa dambiilayaal iyagoo kale ah hadii aysan towbad keenin" maantana Jabuuti ayuu la fariistay isagoo yiri "waxaan la saxiixanay heshiisyo Dowladda FKMG"

Shariifku wuxuu Iclaamiyay dagaal Jihaad ah oo ka dhan ah cadowga kusoo duulay diinteena iyo dalkeena maantana wuxuu yiri "waxaan saxiixnay xabad joojin ee hala qaato" waa yaabe ma waxaa laga xoreeyay Dalka gaaladii kusoo duushay mise iskood ayay uga bexeen.

Shariifku wuxuu yiri heshiiska aan galnay wuxuu lamid yahay sulxul xudaybiya waa yaabe nabigu SCW Heshiiska ma wuxuu la galay Islaam, Gaalo mise Munaafiqiin? Sahariifku wuxuu yiri "wixii kasoo horjeesta heshiiskan Beri ayaan ka noqonaynaa" waaba kaba darane maxaa helay Shariifka oo halkuu ka keenay in uu Beri ka noqdo qof Muslim ah gaalana ay kusoo duushay oo Jihaad ku jira.

Waxaa kale oo Heshiiska ku jira in Gaaladan Tigreega ah ee soo duulay lagu badalo gaalo kale oo ka xoog weyn iskuna hadaf yihiin, hadaba maxay ku kala duwan yihiin? wuxuu Shariifku intaa raaciyay "waxaan iri hala dagaalamo waa layga yeelay markaan iri hala Joojiyo maxaa lagu diiday" Hadaba ma waxaa meesha ka baxay wixii laga dagaalamay? jawaabtu waa Maya....

Shariifku waxaa kale uu yiri "hadii aan ciidamo shisheeye la helin waxaa dhacaya dagaalo sokeeye" Shariifku ma wuxuu iloobay lixdii bilood ee dahabiga aheyd nabadii la helay markii ay Umaddu hirgalisay ku dhaqanka Shareecada Islaamka, iyadoo aan garab laga helin ciidamo shisheeye, hadaba Shariifka waxaan leeyahay hadii ciidamo shisheeye nabad ay keenayaan ma aysan burburiyeen nabadii ay xoogaga Islaamku dhaliyeen.
Iyadoo aan ogsoonahay in ay jiraan caqabado waaweyn ayuu shariifku sheegay in dib u heshiisiin las amaynayo, caqabadahaasna waxay kala yihiin.

1.Dalka oo wali gumaysi ku jira.
2.Faragalintii shisheeyaha oo wali socota.
3.Dagaal oogayaashii dambiyada dalka iyo dadka ka galay oo wali
horboodaya siyaasada dalka.
4.Iyadoo wali ay shisheeyuhu hogaanka u hayaan shirarka dib-
uheshiisiinta gudaha dalkana aan loo ogolayn in lagu qabto.

Waa yaabe maxaa qaaday Shariifka ma cabsi ayaa waxaas oo dhan ku xambaartay mise balanqaad dhaqaale iyo darajo ayuu helay, sikastooy ahaataba waxaa iska cad in shariifku uu ka bayray wadadii uu sanad iyo dhowr bilood kahor ku hogaaminayay Maxaakiimta Islaamiga ah iyadoo markii horeba ay dadbadani ka xumaayeen midowga ay la midoobeen xubnihii ka tirsanaa baarlamaan kusheegii Imbaghati, hadaba waxaan lee yahay shariifku ha kasoo noqdo wadadaas qaldan, mujaahidiinta gudahana waxaan leeyahay siiwada Jihaadka barakaysan haday gaalo idin nacdo ilaahay ayaa idin jecele.

W.Q. C/salaam Cismaan Faarax